Börnin í Beslan ári síðar

Þann 1. september 2004, fyrir ári síðan, réðust gíslatökumenn inn í skóla númer eitt í Beslan í Norður-Ossetíu í Rússlandi. Tilhlökkun barna og foreldra við upphaf nýs skólaárs breyttist fljótt í martröð. Þremur dögum síðar voru yfir 170 börn látin ásamt hundruðum fullorðinna.

Börnin sem lifðu harmleikinn af misstu systkini, foreldra og vini og upplifðu atburði sem ekkert barn á að þurfa að upplifa. Gíslatakan vakti mikla heimsathygli þar sem um var að ræða árás sem beint var að saklausum börnum í pólitísku markmiði og því sérstaklega grimmdarleg.

UNICEF starfaði í nágrenninu þegar harmleikurinn átti sér stað og gat því komið fljótt til hjálpar. Flest börnin höfðu verið lögð inn á fjóra spítala í Vladikavkaz og sá UNICEF að mikil þörf var á grundvallarsjúkragögnum og lyfjum. UNICEF útvegaði því strax verkjalyf, sárabindi og annað slíkt. Nokkrum dögum síðar veitti UNICEF 5 spítölum í Beslan og Vladikavkaz sjúkragögn eins og rúm, teppi, dýnur, hjartalínurit, lín, sápur, hanska, plástra, sprautur og fleira.

UNICEF var til staðar með skólagögn, húsgögn og tæki þegar börnin snéru aftur í skólana og hefur ekki yfirgefið börnin síðan. Nú mun UNICEF útvega skólagögn til tveggja nýrra skóla sem voru tilbúnir við upphaf skólaársins í ár og mun hýsa um 600 nemendur.

Líkamlega hafa krakkarnir náð sér að fullu, en þau eru enn að vinna úr hinu mikla sálræna áfalli sem fylgdi í kjölfarið. UNICEF telur að öll börn í Beslan hafi orðið fyrir áhrifum af gíslatökunni á einn eða annan hátt.

Nú þegar ár er liðið frá atburðunum opna börn og ungmenni ljósmyndasýningu sem unnin var á námskeiði sem UNICEF hélt og markar opnun sýningarinnar þau tímamót sem fórnarlömb gíslatökunnar minnast um þessar mundir. 

UNICEF hefur aðstoðað við að leiða teymi ráðgjafa í skólanum og í samfélaginu sem ætlað er að hjálpa börnum og fjölskyldum þeirra að byggja upp líf sitt að nýju. Um 7 þúsund börn og foreldrar mun njóta aðstoðarinnar. Mörg barnanna þurfa að fá hjálp við að komast aftur í skóla og öðlast trú á skólakerfið að nýju.

Það sem gerðist í Beslan er mikill harmleikur í heimshluta sem þegar hefur þurft að upplifa ofbeldi og óstöðugleika. Mikilvægt er að leggja niður ágreining og vinna að friði. UNICEF styður fræðslu um frið fyrir börn og ungmenni í Norður-Ossetíu, Ingushetíu, Tsjetsjníu, Kabardino-Balkaria og Dagestan og hvetur til umræðna og umburðarlyndis milli barna á þessum ólgusvæðum.

Fulltrúar UNICEF geta gefið fjölmiðlum viðtöl á ensku um ástandið í Beslan. Upplýsingar hjá UNICEF Ísland í síma 552 6304 (Anna).