Hlutverk heimsforeldra mikilvægt

Vegna fjölda fyrirspurna síðustu daga er vert að taka það fram að heimsforeldrar styrkja ekki eitt ákveðið barn, heldur verkefni sem hjálpa mörgum börnum. Verkefnin geta t.d. verið að bólusetja öll börn í einu landi, byggja skóla, veita aðgang að vatni og hreinlætisaðstöðu, veita umönnun til HIV-smitaðra, sjá um munaðarlaus börn, frelsa börn úr stríðum og svo mætti lengi telja. UNICEF sinnir einnig neyðaraðstoð og leggur mikla áherslu á vernd, menntun og heilsugæslu barna sem hafa þurft að flýja heimili sín vegna náttúruhamfara eða stríðsátaka. UNICEF starfar eingöngu vegna frjálsra framlaga einstaklinga, fyrirtækja og ríkisstjórna. Hlutverk heimsforeldra er því mjög mikilvægt.