Um 246 milljónir barna í vinnuþrælkun
Í dag kynnti landsnefnd UNICEF á Bretlandi nýja skýrslu sína um barnaþrælkun, en samkvæmt henni eru 246 milljónir barna í ánauð vinnuþrælkunar í dag. Börn, allt niður í fimm ára gömul, eru svift frelsinu sem fylgir barnæskunni og þeim grundvallarréttindum sem öll börn eiga að hafa eins og t.d. að ganga í skóla.
Með vinnuþrælkun er átt við að börn séu látin vinna líkamlega erfiða vinnu sem ógnar lífi þeirra og heilsu. Fram kemur í skýrslunni að yfir 180 milljón barna (undir 18 ára aldri) séu hneppt í verstu tegund vinnuþrælkunar, þ.e. sem talin er mjög skaðleg heilsu barna og ungmenna. Það eru um eitt af hverjum tólf börnum í heiminum.
Við hvað vinna börn?
Börn eru látin vinna í verksmiðjum, við þjónustustörf, verslunarstörf og ræstingar. Um 70% barna sem eru í vinnu starfa við landbúnaðarstörf, 8% í verksmiðjum og 8% í verslunarstörfum, á veitingastöðum, hótelum og öðrum þjónustustörfum. Í skýrslunni er einnig fjallað um ein af óhugnalegustu hliðum barnaþrælkunar, þ.e. þegar börn, og þá aðallega stúlkur, eru neyddar til að stunda vændi.
Hvar er barnaþrælkun stunduð?
Barnaþrælkun á sér stað í öllum heimshlutum. Barnaþrælkun er hlutfallslega mest í Afríku þar sem 41% barna 5-14 ára stunda erfiðisvinnu. Um 48 milljónir barna eru notuð í vinnu bara í sunnanverðri Afríku. Í Asíu og við Kyrrahafið eru 127,3 milljónir barna við vinnu núna, 17,4 milljónir í Rómönsku Ameríku og við Karabíska hafið og 13,4 milljónir í Miðausturlöndum og Norður-Afríku. Á Vesturlöndum eru 2,5 milljónir barna notuð í vinnuþrælkun og 2,4 milljónir í löndum sem eru að breytast og verða ríkari.
Af hverju eru börn látin vinna?
Nokkrar ástæður eru fyrir því að börn þurfa eða eru neydd til vinnu. Í fyrsta lagi er umhverfið ekki verndandi fyrir börn og því er ekkert sem getur komið í veg fyrir það að barnaþrælkun viðgangist í viðkomandi landi eða á viðkomandi stað.
Önnur mikilvæg ástæða er fátækt. Í löndum þar sem þjóðartekjur eru undir 60 þúsund krónum á hvern einstakling er hlutfall vinnandi barna um 30-60%. Börn vinna oft inni á heimilinu eða við búskap fjölskyldunnar og eru þar með frítt vinnuafl, en eru svift þeim réttindum sínum að ganga í skóla og þar með verður erfiðara fyrir þau að brjótast úr vítahring fátæktarinnar. Oft er einnig sóst mjög eftir börnum í vinnu þar sem þau eru mjög ódýrt vinnuafl. Lítil menntun getur verið bæði afleiðing þess að börn fari að vinna og orsök.
Einnig geta börn þurft að fara út á vinnumarkaðinn vegna skyndilegra áfalla eða breytinga á fjölskylduhögum. Þar spilar t.a.m. HIV/alnæmi stóran þátt. Við veikindi foreldra eða þegar fyrirvinna fjölskyldunnar fellur frá neyðast börn oft til að fara út á vinnumarkaðinn.
Hvað gerir UNICEF?
UNICEF vinnur að því um allan heim að afnema barnaþrælkun. Verndun barna er eitt af fimm forgangsatriðum UNICEF, en með því er átt við að vernda börn gegn vinnu, kynlífsþrælkun og stríði og ofbeldi. UNICEF leggur áherslu á að búa til verndandi umhverfi fyrir börn þar sem þau geta vaxið og dafnað. Til að ná markmiðum sínum vinnur UNICEF með yfirvöldum til að breyta lögum, efla verkalýðsfélög, og reyna að breyta viðhorfi almennings til að réttindi barna verði virt. UNICEF fókusar á menntun og miða mörg verkefni að því að fá börn í skóla eða til að sækja óformlega skóla þar sem þeim er hjálpað smám saman. UNICEF spilar stórt hlutverk í að frelsa börn úr hermennsku og sinnir þeim sem orðið hafa fyrir sálrænum áföllum. UNICEF vinnur einnig með landamæravörðum og öðrum aðilum til að reyna að hamla mansal og veita fórnarlömbum þess viðeigandi aðstoð.
