UNICEF Ísland eins árs!!

Laugardaginn 12. mars fagnaði landsnefnd UNICEF á Íslandi eins árs afmæli sínu. Af því tilefni var slegið upp barnaafmæli í Miðstöð Sameinuðu þjóðanna að Skaftahlíð 24. Boðið var upp á barnaafmælisköku, djús og blöðrudýr frá dýpstu frumskógum Afríku. Barnakór Ísaksskóla söng afmælissönginn, Hótel jörð og lag úr Línu Langsokk við mikinn fögnuð gesta.

Í afmælisveislunni kynnti UNICEF Ísland nýjan bækling um Barnasáttmála Sameinuðu þjóðanna sem dreift verður til allra 6. og 7. bekkinga á landinu næstu daga í samstarfi við Námsgagnastofnun og Prentsmiðjuna Odda. Bæklingurinn er gerður að norskri fyrirmynd og er ætlað að fræða börn og ungmenni um réttindi sín og skyldur.