Þú ert hér:
Fyrirtæki, einstaklingar og íslenska ríkið taka höndum saman og styrkja eitt stærsta bólusetningarátak í heiminum – framlagið getur veitt 300 þúsund börnum bólusetningu gegn mænusótt.
Barnahjálp Sameinuðu þjóðanna á Íslandi tilkynnti í dag um rúmlega 20,5 milljóna króna styrk frá Hreini Loftssyni hrl., Lýsi hf., Frímúrarareglunni á Íslandi, Eimskipi, Samherja, Klofningi, Íslensku umboðssölunni, Sölku-Fiskmiðlun, Norlandiu, Ice-Group og Félagsbúinu Miðhrauni til bólusetningarverkefnis UNICEF gegn mænusótt í Nígeríu. Íslenska ríkið veitir auk þess 100.000 dollurum til átaksins í gegnum Alþjóðaheilbrigðismálastofnunina (WHO). Framlagið frá Íslandi nemur því alls tæpum 28 milljónum króna (375.000 USD).
Bólusetning er ein ódýrasta og öflugasta leiðin til að bjarga mannslífi. UNICEF áætlar að bólusetning gegn mænusótt kosti aðeins um 90 krónur (1,25 USD) og því mun framlagið frá Íslandi geta fjármagnað sem nemur 300 þúsund bólusetningum eða sem samsvarar fjölda Íslendinga!
Um er að ræða þátttöku í einu stærsta bólusetningarátaki í heiminum sem UNICEF, Alþjóðaheilbrigðismálastofnunin (WHO), Rotary International og fleiri samtök standa að og miðar að því að útrýma mænusótt fyrir fullt og allt við lok árs 2007. Fjárframlagið frá íslensku fyrirtækjunum rennur til UNICEF í Nígeríu, en það sem af er árinu 2006 hafa 78% allra nýrra mænusóttartilfella greinst þar í landi.
Davíð Á. Gunnarsson, ráðuneytisstjóri í heilbrigðis- og tryggingamálaráðuneytinu og stjórnarmaður og fyrrum stjórnarformaður WHO, flutti erindi á fundi Barnahjálpar SÞ á Íslandi í dag. Hann fjallaði um samstarf UNICEF og WHO sem nær allt til ársins 1950, en saman hófu stofnanirnar alheimsátakið gegn mænusótt árið 1988. „Átakið hefur gengið vel, svo vel að talið var að tekist hefði verið að útrýma mænusótt um aldamótin og til marks um það er ekki minnst á mænusótt í Þúsaldarmarkmiðum Sameinuðu þjóðanna sem sett voru árið 2000 og ná til 2015,“ sagði Davíð Á. Gunnarsson. „En fyrir um þremur árum síðan greindust mænusóttartilfelli í Nígeríu og víðar og nú hafa samtök eins og UNICEF, WHO og Rótarý International haldið alheimsátakinu áfram með bólusetningarherferðum. Í dag eru börn bólusett hvar sem þau finnast og hægt er að bólusetja á staðnum í stað þess að láta börn bíða í röðum eftir bólusetningu.“ Davíð óskaði UNICEF og styrktaraðilum til hamingju með þetta rausnarlega fjárframlag og bætti við að vel væri tekið eftir framlögum Íslands til þessa átaks meðal UNICEF og WHO.
Þórólfur Guðnason, yfirlæknir á Sóttvarnasviði Landlæknisembættisins, sagði að ekki væri spurning hvort, heldur hvenær hægt yrði að útrýma mænusótt fyrir fullt og allt. Mænusótt var útrýmt í Evrópu frá og með 2002 og frá 1960 á Íslandi, en það sem af er árinu 2006 (20. apríl) hafa 214 tilfelli greinst í heiminum í níu löndum. Þórólfur sagði að mænusótt legðist aðallega á börn og mörg hver yrðu fyrir varanlegri lömun eftir sýkinguna, því væri mikilvægt að alþjóðasamfélagið legðist á eitt við að útrýma þessum hræðilega sjúkdómi. Hann benti á að fólk gæti sýkst en verið einkennalaust og smitað aðra, því þyrfti að bólusetja í fleiri ár til að útrýma sjúkdómnum alveg.
Katrín Pétursdóttir, forstjóri Lýsis hf., talaði fyrir hönd styrtaraðila og sagði að nígeríski markaðurinn væri mjög verðmætur fyrir ákveðinn fiskútflutning og að þróunin væri sú að Nígería væri að verða enn verðmætari með árunum. Í dag er markaðurinn í Nígeríu til að mynda stærri en sá kínverski. Katrín sagði ennfremur að íslensku fyrirtækjunum bæri siðferðisleg skylda til að skila til baka hluta af ávinningi viðskiptanna við Nígeríu og ekki síst þar sem mikil þörf sé á fjármagni til þróunaraðstoðar í landinu.
Einar Benediktsson, stjórnarformaður UNICEF Ísland, sagði að til að útrýma mænusótt fyrir fullt og allt þyrfti samstarf margra aðila, bæði á Vesturlöndum og á vettvangi þar sem þessi ógnvænlegi sjúkdómur hefur komið upp aftur á síðustu árum. „Vegna samstöðu fjölmargra íslenskra styrktaraðila mun okkur nú takast að leggja þessu alheimsátaki gegn mænusótt lið með rausnarlegu fjárframlagi. Ef við getum hjálpað 300 þúsund börnum, þá er vel gert,“ sagði Einar og þakkaði styrktaraðilum fyrir hönd þeirra sem munu njóta góðs af framlaginu.
Bólusetning getur bjargað mannslífi
Þann 21. apríl sl. höfðu 169 ný mænusóttartilfelli greinst í 15 héruðum Nígeríu fyrir árið 2006. Á sama tímabili árið 2005 höfðu 73 tilfelli greinst í 14 héruðum. Ástandið er sérstaklega slæmt í norðurhéruðum landsins þar sem af ýmsum ástæðum getur reynst erfitt að fá fjölskyldur til að þiggja bólusetningu. Vonast er til að hægt verði að stöðva þessa þróun sem fyrst og er því stuðningurinn frá Íslandi mjög kærkominn.
Áður en bóluefnið gegn mænusótt var uppgötvað árið 1955 dóu allt að hálf milljón jarðarbúa úr sjúkdómnum árlega. Frá því árið 1988 hefur mikill árangur náðst í að útrýma mænusótt með markvissum bólusetningum meðal barna. Sjúkdómstilfellum hefur fækkað um 99% á síðustu 18 árum og er útbreiðsla sjúkdómsins í dag tengd fátækt, vannæringu og ónógu hreinlæti. Afleiðingar mænusóttar hjá börnum geta verið varanleg lömun og jafnvel dauði en alþjóðasamfélagið gerir sér vonir um að þessi válegi sjúkdómur muni heyra sögunni til frá og með árinu 2008.
Nígería – hið fjölmenna og fátæka ríki Vestur-Afríku
Nígería er staðsett í Vestur-Afríku og er fjölmennasta ríki álfunnar með um 130 milljónir íbúa sem þýðir að einn af hverjum fimm Afríkubúum koma þaðan. Landið er 923.760 km² að stærð eða rétt tæplega 9 sinnum stærra en Ísland. Nígería er eitt mesta olíuframleiðsluríki heims, en tölur sína að um 60% þjóðarinnar búa við sára fátækt og hafa einn bandaríkjadollara eða minna til framfærslu á dag. Rúm 80% íbúanna draga fram lífið á 2 dollurum eða minna á dag. Því er ljóst að meirihluti íbúa hefur ekki hagnast af olíuauðlind landsins.
