Vissir þú að...

á 45 sekúndna fresti deyr barn af völdum malaríu. Flugnanet til að koma í veg fyrir malaríu kostar aðeins 776 krónur.

Þú ert hér:  

unicef.is
12.des.2007

Þróun í þágu barna - ný skýrsla UNICEF

© UNICEF/ThomasÍ nýrri skýrslu sem gefin var út í vikunni af Barnahjálp Sameinuðu þjóðanna, UNICEF, er að finna upplýsingar um hvernig þjóðum heims miðar að því að ná Þúsaldarmarkmiðum Sameinuðu þjóðanna.
 
Skýrslan Progress for Children: A World Fit for Children Statistical Review er sú sjötta í röð skýrslna sem bera yfirskriftina Progress for Children og gefnar eru út af UNICEF. Hún er jafnframt sú yfirgripsmesta í röðinni.
 
„Í þessari útgáfu er að finna yfirgripsmiklar upplýsingar um Þúsaldarmarkmiðin,“ sagði Ann M. Veneman, framkvæmdastjóri UNICEF. „Á sama tíma og upplýsingarnar sýna fram á umtalsverðar framfarir þá er miklu meira ólokið.“
 
Nýlega var tilkynnt að árið 2006 hefði fjöldi þeirra barna sem deyja fyrir fimm ára aldur í fyrsta sinn í sögunni verið lægri en tíu milljónir. Í Progress for Children er að finna upplýsingar um aðgerðir sem hafa leitt til þessara framfara. Þar á meðal eru aðgerðir sem gætu dregið enn frekar úr barnadauða.
 
Meðal þess sem fram kemur í skýrslunni er:
  • Á árunum 1990-2004 fengu yfir 1,2 milljarðar manna aðgang að hreinu drykkjarvatni.
  • Á árunum 1996-2000 jókst tíðni brjóstagjafar á fyrstu mánuðunum í lífi barna í mörgum löndum – atferli sem gæti mögulega komið í veg fyrir 13% allra dauðsfalla barna undir fimm ára aldri í þróunarlöndunum. Um 20% aukningu er að ræða í sjö löndum sunnan Sahara.
  • Í löndum þar sem malaría er landlæg hefur fjöldi barna sem sefur undir malaríuneti með skordýraeitri aukist. Í sumum löndum er um að ræða allt að þreföldun frá 2000.
  • Rúmlega fjórfalt fleiri börn fengu ráðlagðan skammt af A-vítamíni árið 2005 en árið 1999. A-vítamín dregur úr líkum á því að barn deyi vegna algengra sjúkdóma.

Auk þess sem mikilvægur árangur hefur náðst í heilsugæslu barna hafa framfaraskref einnig verið tekin í menntamálum, jafnréttismálum kynjanna og barnavernd. 

Fjöldi barna á grunnskólaaldri sem ekki gengur í skóla dróst t.d. saman um 20% á árunum 2002-2006.
 
Og þó stúlkum sé enn mismunað á sumum svæðum með tilliti til menntunar er bilið milli stúlkna og drengja í skólum smám saman að dragast saman. Árið 2005 höfðu tveir þriðju hlutar heimsins þannig náð jöfnuði hvað varðar grunnmenntun.
 
Þó um hæga framför sé að ræða sýnir skýrslan að afskurður á kynfærum stúlkna hefur dregist saman á síðustu 15 árum og að ótímabær gifting barna er ekki eins algeng og áður.
 
Í skýrslunni er hins vegar einnig að finna tölfræði sem lítil ástæða er til að gleðjast yfir. Til dæmis:
  • Meðan tíðni barna í þróunarlöndunum sem eru of létt hefur dregist saman frá 1990 - úr 32% í 27% - þjást skelfilega mörg börn undir fimm ára aldri - 143 milljónir – af vannæringu. Rúmlega helmingur þeirra býr í Suður-Asíu.
  • 27% dauðsfalla barna undir fimm ára aldri má rekja til lungnabólgu og malaríu. Samt hefur gengið hægt að auka tíðni þeirra sem fá meðferð við þessum skæðu sjúkdómum.
  • Árlega deyja fleiri en 500.000 konur af barnsburði. Um helmingur þessara dauðsfalla eiga sér stað í Afríku, sunnan Sahara, þar sem líkurnar á að kona með barni deyi eru 1/22. Til samanburðar eru líkurnar 1/ 8.000 í hinum iðnvædda heimi.
  • Fleiri en 1,5 milljónir barna deyja árlega úr niðurgangi vegna skorts á grunnhreinlætisaðstöðu, bágu hreinlæti og ótraustu drykkjarvatni. Þrátt fyrir að einhver árangur hafi náðst í að tryggja aðgang fólks að viðunandi hreinlætisaðstöðu frá 1990 reynist erfitt að halda í við fólksfjölgun.
  • 4,3 milljón HIV-smit komu upp árið 2006. Þar af voru 40% meðal ungs fólks. Mikið vantar upp á að þessi berskjaldaði hópur fái viðhlýtandi fræðslu um hvernig koma má í veg fyrir smit.

 

Nánari upplýsingar um skýrsluna er að finna á alþjóðlegri vefsíðu UNICEF.