Þú ert hér:
Í heilsugæsluátaki sem hófst í dag í Síerra Leóne er áætlað að gefa 1,2 milljón kvenna á aldrinum 15-49 ára bólusetningu gegn stífkrampa og 85 þúsund börn frá 0-59 mánaða munu fá A-vítamín og lyf við ormum í maga.
UNICEF, WHO og aðrir samstarfsaðilar styrkja þetta átak sem mun standa í heila viku. Markmiðið er að draga úr hárri tíðni ungbarnadauða vegna stífkrampa, sem er einn af skaðlegustu sjúkdómunum í landinu. Tíðni ungbarnadauða er sú hæsta í Síerra Leóne eða 167 dauðsföll af 1000 lifandi fæddum.
Með því að útrýma dauða mæðra vegna stífkrampa og vernda ungabörn þeirra verður hægt að draga verulega úr dauðsföllum í landinu. Átakið mun auka vitund almennings á mikilvægi hælsuverndar mæðra og ungabarna og styrkja eftirlit með sjúkdómum í landinu. Átakinu verður fylgt eftir í maí og nóvember.
Stífkrampi er sjúkdómur sem hægt er að koma í veg fyrir með einfaldri bólusetningu. Hins vegar deyja um 180 þúsund nýfædd börn úr stífkrampa árlega í heiminum. Um 30 þúsund mæður deyja árlega vegna sjúkdómsins og er hann valdur að a.m.k. einu af hverjum tuttugu dauðsföllum mæðra.
Í Síerra Leóne má rekja 14% dauðsfalla ungabarna til stífkrampa. Ein orsök er lítið hreinlæti þar sem börn eru fædd, sér í lagi geta börn þá smitast þegar klippt er á naflastrenginn. Eins má rekja smitleið kvenna eða mæðra til óhreinlætis.
