Þörfin á neyðaraðstoð er mikil

Í nýrri skýrslu Barnahjálpar Sameinuðu þjóðanna sem kynnt var í gær, Humanitarian Action Report (HAR) 2008, kemur fram að UNICEF þarf rúmlega 58 milljarða króna (865 milljón bandaríkjadali) til að koma börnum og konum til hjálpar á neyðarsvæðum í 39 löndum víðsvegar um heiminn.

Í skýrslunni er m.a. að finna upplýsingar um lönd þar sem pólitísk átök geisa, svo sem Tsjad og Kenía. Þar eru einnig upplýsingar um svæði sem skekin eru af átökum en rata ekki lengur í fréttir. Þar halda börn hins vegar áfram að þjást. Skýrslan beinir athyglinni sömuleiðis að löndum sem orðið hafa illa út úr náttúruhamförum, eins og Mósambík þar sem mikil flóð hafa haft skelfilegar afleiðingar. Neyðaraðgerðum UNICEF er lýst í skýrslunni auk þess sem gerð er grein fyrir hve mikla fjármuni samtökin þurfa til að mæta þörfum barna og kvenna í neyð.

„300.000 manns hafa flúið heimili sín vegna átakanna í Kenía og dvelja nú í flóttamannabúðum, þar af 150.000 börn. Áætlar UNICEF að 80.000 þessara barna séu yngri en fimm ára. Ástandið í Tsjad er nokkuð óljósara en þó má ætla að af þeim 52.000 sem hafa verið hraktar frá heimilum sínum séu 30.000 berskjaldaðar og þarfnast sérstakrar aðstoðar. UNICEF útvegar nauðsynlega hjálp á sviði heilsugæslu, menntunar og næringar,” sagði Hilde Johnson, aðstoðarframkvæmdastjóri UNICEF á blaðamannafundi í Genf. „Á báðum þessum átakasvæðum, sem og á hinum 37 neyðarsvæðum sem fjallað er um í skýrslunni, bitnar neyðin fyrst og fremst á börnum og konum.”

Í skýrslunni er einnig gerð grein fyrir fjárþörf UNICEF vegna mannúðaraðstoðar í Súdan. Þrátt fyrir að mikið uppbyggingar- og þróunarstarf sé nú unnið um gjörvalt Súdan, þjáist stór hluti þjóðarinnar – sérstaklega í Darfur-héraði. Talið er að 2,1 milljón manna séu á flótta innan héraðsins og hefur sá fjöldi farið vaxandi. Þúsundir barna frá Darfur, sem eru nú staðsett í Miðafríkulýðveldinu og Tsjad, þurfa nauðsynlega á aðstoð og vernd að halda. Verkefni sem UNICEF tekur þátt í í Súdan kosta um 150 milljón bandaríkjadali og hafa að markmiði að efla heilsugæslu, næringu og menntun, auka aðgang að hreinu drykkjarvatni og viðunandi hreinlætisaðstöðu og efla barnavernd.

Þrátt fyrir að ástandið í Vestur-Afríku sé ekki áberandi í umræðunni, eins og fram kemur í Humanitarian Action Report 2008, er nærri ein milljón manna á flótta vegna átaka á svæðinu. Ein afleiðingin er vannæring og kemur hún sérstaklega illa niður á ungum börnum. Í Lýðveldinu Kongó má t.d. rekja meira en helming allra dauðsfalla ungra barna til vannæringar.

Í skýrslunni er athyglinni beint að þeirri skelfilegu staðreynd að konur og börn eru í auknu mæli fórnarlömb skipulagðra nauðgana, sem mismunandi hópar beita oft kerfisbundið gegn óvinum sínum.

„Við verðum að tryggja börnum og konum eins mikla vernd og mögulegt er gegn þessum grimmdarverkum. Og við verðum sömuleiðis að sjá til þess að þeir sem bera ábyrgð á slíkum glæpum séu á endanum leiddir fyrir lög og rétt,” áréttaði Johnson.

Ofbeldi og átök koma oft í kjölfar náttúruhörmunga og bæta þannig enn á þjáningu barna og kvenna á svæðinu. Þegar pólitísk átök brutust út í Kenía í kjölfar kosninga í desember 2007 ríkti þar þegar mikil neyð vegna harðra þurrka og útbreiðslu alnæmis.

Samkvæmt skýrslunni hefur betri viðbúnaður vegna náttúruhörmunga bætt ástandið í löndum sem hörmungar skella reglulega á. 500.000 manns annars vegar og 140.000 hins vegar létust þegar fellibylir gengu yfir Bangladess árin 1970 og 1991. Þegar fellibylur af svipuðum styrkleika gekk yfir landið í nóvember 2007 létust hins vegar mun færri eða 1.400 manns – þökk sé betri viðbúnaði.

Skýrslan fjallar um þann lærdóm sem draga má af hörmungunum í kjölfar flóðbylgnanna í desember 2004. Meðal þess sem kemur fram er að nauðsynlegt er að samræma betur aðgerðir allra hlutaðeigandi og gera Sameinuðu þjóðunum kleift að bregðast skjótar við með því að bæta stofnanir eins og Central Emergency Response Fund (CERF). Einnig er mikilvægi þess að samfélögin séu betur undirbúin fyrir hörmungar áréttað og að þeim sé hjálpað að greina hættumerki.

„Samstarf við staðbundin samfélög, ríkisstjórnir, stofnanir Sameinuðu þjóðanna, frjáls félagasamtök og einkageirann geta skipt sköpum, ekki aðeins til að koma neyðaraðstoð til þeirra sem á þurfa að halda heldur einnig til að miðla upplýsingum sem geta bjargað mannslífum,” sagði Johnson.

Þessi lærdómur hefur nýst vel í hjálparstarfi í Mósambík þar sem rétt og skjót viðbrögð hafa hjálpað 95.000 manns – fyrst og fremst börnum og konum – sem hafa neyðst til að flýja heimili sín.

Allt í allt gat UNICEF fjármagnað 52% af því sem samtökin þurftu til neyðaraðstoðar á síðasta ári. UNICEF hlakkar til að vinna áfram með styrktar- og samstarfsaðilum að því að bæta viðbrögð þegar neyð kemur upp.

Skýrsluna í heild sinni er hægt að nálgast hér.