Nú tveimur mánuðum síðar, þegar kastljós fjölmiðla hefur að mestu leyti beinst frá landinu, vinnur starfsfólk Barnahjálpar Sameinuðu þjóðanna (UNICEF)enn hörðum höndum að því að koma börnum á svæðinu til hjálpar. Samtökin vinna meðal annars áfram að því að koma lífsnauðsynlegum lyfjum og öðrum sjúkragögnum til nauðstaddra. Áfram verður kapp lagt á að tryggja börnum aðgang að heilnæmu drykkjarvatni og viðunandi salernisaðstöðu. Mikil áhersla er á að koma skólastarfi af stað á nýjan leik og lífi barna aftur í sem eðlilegastar skorður. Loks er mikið verk framundan á sviði barnaverndar, og þá sérstaklega að koma börnum sem hafa orðið viðskila við fjölskyldur sínar til hjálpar.

„Nargis hefur sett alvarlegt mark sitt á líf ótalmargra barna í Mjanmar, öryggi þeirra og velferð. UNICEF vinnur að því að mæta þörfum þessara barna og tryggja að þau haldi áfram að fá þá hjálp sem þau þurfa,“ sagði yfirmaður UNICEF í Mjanmar, Ramesh Shrestha. „Þau mega ekki gleymast.”

Íslendingar gefa þrjár milljónir til neyðaraðstoðar UNICEF í Mjanmar
Formlegri fjársöfnun á Íslandi vegna hjálparstarfs UNICEF í Mjanmar er nú lokið. Alls söfnuðust rúmar þrjár milljónir króna og vilja samtökin koma á framfæri þakklæti til þess mikla fjölda Íslendinga sem lagði söfnuninni lið. Þessir fjármunir munu nýtast í hjálparstarfi UNICEF á svæðinu á komandi misserum.

„Það er hughreystandi að sjá hve Íslendingar bregðast skjótt og vel við ákalli um hjálp til barna í neyð. Framlög almennings hérlendis sem erlendis skipta sköpum fyrir líf hundruð þúsunda barna í hópi fórnarlamba hamfaranna í Mjanamar,“ sagði Stefán Ingi Stefánsson, framkvæmdastjóri UNICEF á Íslandi.