Svikapóstur frá meintu UNICEF-netfangi

UNICEF á Íslandi hefur fengið ábendingu um að svikatölvupóstur, sem virðist vera frá alþjóðlegum starfsmanni UNICEF, hafi borist hérlendum aðilum. Meintur sendandi tölvupóstsins, Tommy Gold, segist stýra verkefni innan Evrópusambandsins vegna skyndilegra fuglaflensutilfella „innan vissra hluta Evrópusambandsins“. Lofar hann gulli og grænum skógum ef viðtakandi póstsins tekur að sér að stofna bankareikning í Bandaríkjunum og gerast milligöngumaður um móttöku og innlausn fjármunana, en sjálfur segist hann ekki koma því við vegna mikilla anna.

UNICEF á Íslandi vill árétta að ekki er um tölvupóst frá starfsmanni UNICEF að ræða. Þykir landsnefndinni leitt að óprúttnir aðilar misnoti góðan orðstír UNICEF í miður göfugum tilgangi. Við ítrekum að starfshættir og meðhöndlun fjármuna, eins og lýst er í tölvupóstinum, eru fjarstæðukenndir enda starfar UNICEF eftir mjög stífum starfsreglum, bæði á Íslandi og alþjóðlega.