Í nýrri skýrslu Barnahjálpar Sameinuðu þjóðanna (UNICEF), Humanitarian Action Report (HAR) 2010, kemur fram að UNICEF þarf um 1,2 milljarða bandaríkjadala til að koma börnum og konum til hjálpar á 28 svæðum þar sem samtökin telja að þörfin á neyðaraðstoð sé sérstaklega aðkallandi.

Neyðarsvæðin 28 sem tiltekin eru í skýrslunni eru skilgreind eftir umfangi neyðarinnar og hve viðvarandi ástandið er; áhrifum þess á börn og konur og möguleikanum á árangri og lífsbjörg. Þrátt fyrir að horft sé sérstaklega til 28 neyðarsvæða í skýrslunnu vinnur UNICEF að neyðarhjálp í rúmlega 80 löndum og bregst við skilgreindri neyð í meira en 200 tilfellum á ári hverju.

Hamfarir og neyðarástand eru prófsteinn á vilja alþjóðasamfélagsins til að tryggja réttindi barna. Hvort sem hamfarir eru af völdum náttúru eða af mannavöldum, þá geta þær haft í för með sér alvarleg brot á réttindum barna, þ.m.t. röskun á búsetu, niðurbrot efnahagskerfa og félagsgerðar og aukna hættu á skaða og sjúkdómum.

Hægt er að nálgast skýrsluna hér.

Frétt um HAR 2010 má lesa á alþjóðlegri heimasíðu UNICEF hér.

Nýjar ógnir
HAR 2010 varpar m.a. ljósi á þrenns konar þróun sem átt hefur sér stað á undanförnum árum og sem ógnar í síauknum mæli berskjalda börnum: loftslagsbreytingar, ótryggt efnahagsástand í heiminum og breytingar á birtingarmyndum átaka – sér í lagi útbreidd aukning á kynferðislegu ofbeldi gagnvart konum og börnum.

Búist er við að loftlagsbreytingar muni leiða til aukinnar tíðni sjúkdóma, hungurs, fólksflutninga og fleiri hörmunga, en flóð, hvirfilbylir, jarðskjálftar og þurrkar af áður óþekktri stærðargráðu skullu á ýmsum löndum árið 2009. Áframhaldandi efnahagsþrengingar í heiminum, og verðhækkanir á matvöru og eldsneyti þeim tengdar, valda aukinni fátækt og vannæringu. Í sumum fátækari löndum er þessi þróun alvarleg ógn við framþróun á sviði heilbrigðis- og menntamála.

Brugðist við hættu á hörmungum
Á síðustu árum hefur UNICEF, ásamt samstarfsaðilum, lagt mikla áherslu á að bæta áhættumat, þróa viðbragðs- og uppbyggingaráætlanir við neyðarástandi ásamt viðvörunarkerfum. Stöðugar breytingar á sviði mannúðaraðstoðar og eðli hamfara af náttúru- og mannavöldum gera það þó að völdum að ofangreind kerfi þurfa mikið aðhald til að tryggja virkni þeirra í neyðarástandi og hörmungum framtíðarinnar.

HAR 2010 og vettvangsrannsóknir leiða í ljós aukna vannæringu á meðal barna. Árið 2009 tilkynnti Matvælastofnun Sameinuðu þjóðanna að einn milljarður manna byggi við hungur – sem er aukning um 100 milljónir manna, kvenna og barna síðan árið 2008.

Barnasáttmálinn
Árið 2009 var haldið upp á 20 ára afmæli Samnings Sameinuðu þjóðanna um réttindi barnsins, eða Barnasáttmálans eins og hann er kallaður í daglegu tali. Ef tryggja á að öll börn fái notið þeirra réttinda sem sáttmálinn staðfestir þarf enn öflugra átak á sviði neyðar- og mannúðarstarfs, þar sem flókið umhverfi tefur fyrir veitingu þjónustu, vernd, uppbyggingu og endurbótum, sem eru nauðsynlegar til að uppfylla réttindi barna, kvenna og fjölskyldna.