93 milljónir barna hafa ekki tækifæri til að ganga í skóla – meirihluti þeirra eru stúlkur.
Þú ert hér:
Menntun og jafnrétti
Yfir 100 milljón börn ganga ekki í skóla, meiri hluti þeirra eru stúlkur.- Þúsaldarmarkmið Sameinuðu þjóðanna: Öll börn skulu hafa aðgang að grunnmenntun fyrir árið 2015.
Menntun er grundvallarréttindi allra barna og mikilvægur þáttur í félagslegum og persónulegum þroska hvers einstaklings.
Öll börn, bæði stúlkur og drengir, eiga skilið að fá tækifæri til góðrar grunnmenntunar. Réttindamiðuð nálgun til menntunar nær yfir þá mismunun sem er svo rótgróin í sumum samfélögum og byggist á misrétti kynjanna. Þetta misrétti útilokar milljónir barna, sér í lagi stúlkur, frá skólum eða dæmir þau til þess að fá aðeins litla og lélega menntun.
Menntun bætir líf og afkomu einstaklinga. Sýnt hefur verið fram á að menntun getur rofið vítahring fátæktar, komið í veg fyrir sjúkdóma og viðhaldið jákvæðri þróun samfélaga. Góð grunnmenntun gefur stúlkum og drengjum þekkingu og tæki til að lifa heilbrigðara lífi og verja sig gegn HIV/alnæmi og öðrum kynsjúkdómum. Menntun veitir ungmennum einnig sjálfstraust til að taka ábyrgð í samfélaginu og hafa áhrif á ákvarðanatökur sem þau varða. Þannig verða þau einnig nýtir þjóðfélagsþegnar í framtíðinni.
Rannsóknir hafa sýnt að menntaðir einstaklingar, sér í lagi konur, munu hefja barneignir síðar á lífsleiðinni og eignast færri börn. Börn menntaðra foreldra njóta betri heilsu, lifa lengur og eru líklegri til að fá tækifæri til náms.
Markmið UNICEF er að veita öllum börnum góða grunnmenntun með áherslu á jafnrétti kynjanna og útrýmingu mismununar af öllum toga. UNICEF starfar með samstarfsaðilum sínum um allan heim til að ná þessu markmiði sínu.
