45% þungaðra HIV smitaðra kvenna fá nú lyf til að koma í veg fyrir að ófædd börn þeirra fái veiruna, samanborið við 24% árið 2006. Þetta er árangur sem skiptir máli. Vertu með.
Þú ert hér:
Neyðarsafnanir
Frá stofnun UNICEF á Íslandi hefur landsnefndin stutt við ýmis hamfara- og neyðarsvæði. En UNICEF alþjóðlega starfar í nærri 160 löndum og svæðum og því ljóst að þörfin er víða mikil.
Skelfilegt ástand í Austur-Afríku
Sumarið 2011 bárust skelfilegar fréttamyndir frá Sómalíu, Keníu, Eþíópíu og Djibútí. Mestu þurrkar í yfir hálfa öld ollu miklum búsifjum, sem aftur bættust ofan á langvarandi átök í Sómalíu og stighækkandi matvælaverð. Mörg hundruð þúsund börn voru lífshættulega vannærð og þurftu á tafarlausri mannúðaraðstoð að halda.
Átökin í Líbíu 2011
Í mars 2011 hóf UNICEF á Íslandi neyðarsöfnun fyrir barnung fórnarlömb átakanna í Líbíu. UNICEF studdi meðal annars flóttafólk á landamærum Líbíu og sendi hjálpargögn á vettvang. Íslendingar tóku vel í neyðarsöfnuna.
Hér má sjá myndir af landamærum Líbíu.
Flóðin í Pakistan 2010
Í ágúst 2010 hófust mikil flóð í Pakistan. A.m.k. 20 milljónir manna urðu fyrir beinum áhrifum af flóðunum sem komu í kjölfar mikilla monsún-rigninga, þar af um helmingurinn börn. UNICEF á Íslandi safnaði fyrir neyðaraðgerðirnar í Pakistan meðal íslensks almennings.
Hér má sjá myndasafn frá Pakistan.
Jarðskjálfti á Haítí 2010
Öflugur jarðskjálfti reið yfir Haítí þann 12. janúar 2010. Heimili fólks í Port-au-Prince og nágrenni voru ekki bara í molum, heldur voru skólar, heilsugæslustöðvar og aðrar byggingar í rúst. Skrifstofa UNICEF laskaðist jafnvel í jarðskjálftanum. Neyðaraðgerðir hófust nær samstundis. UNICEF á Íslandi safnaði fyrir fórnarlömb jarðskjálftans.
Myndasería frá Haítí - tveimur vikum eftir hamfarirnar.
Átök í Gaza 2008 og 2009
UNICEF á Íslandi sendi 1,6 milljónir íslenskra króna til neyðar- og uppbyggingarverkefna UNICEF í Gaza eftir árás Ísraela í desember 2008. Einn þriðji látinna í átökunum - yfir 430 - voru börn, auk þess sem 1872 börn særðust, sum alvarlega. Árásirnar stóðu í þrjár vikur frá 27. desember 2008 til 18. janúar 2009.
Sjá myndaseríu um ástandið á Gaza.
Hvirfilbylur í Mjanmar (Búrma) 2008
Eftir að hvirfilbylurinn Nargis fór yfir Mjanmar í byrjun Maí 2008 hóf UNICEF á Íslandi neyðarsöfnun. Sendar voru 2,5 milljónir til neyðarverkefna í landinu.
Jarðskjálfti í Pakistan 2005
UNICEF á Íslandi sendi 2,5 milljónir íslenskra króna til neyðarverkefna UNICEF í Pakistan eftir að jarðskjálfti reið yfir í október 2005.
Flóðbylgjan í Indlandshafi 2004
UNICEF var eitt af fimm hjálparsamtökum á Íslandi sem tók þátt í sjónvarpssöfnun fyrir fórnarlömb hamfaranna í Suður-Asíu sem bar heitir Neyðarhjálp úr norðri. Íslenska þjóðin sýndi hvað í henni býr og alls söfnuðust 110 milljónir króna sem skiptir á milli hjálparsamtakanna fimm. UNICEF fékk 16,5 milljónir og rann það til ýmissa neyðarverkefna á hamfarasvæðinu.
