Þátttaka barna og ungmenna

Stjórnlög unga fólksins

Vorið 2011 stóðu UNICEF á Íslandi, Reykjavíkurborg og umboðsmaður barna að verkefninu Stjórnlög unga fólksins.

Alþjóðadagur barna í fjölmiðlum

Í lok febrúar ársins 2009 skrifuðu UNICEF Ísland og Ríkisútvarpið undir samstarfsyfirlýsingu sem kvað á um að hvetja börn og ungmenni til þátttöku í samfélagsumræðunni og skapa vettvang fyrir skoðanir þeirra. Í þeim anda ýtti landsnefndin, í samstarfi við RÚV og Morgunblaðið, verkefninu Fréttaritaraþjálfun unga fólksins úr vör á Heimsdegi barna í fjölmiðlum þann 1. mars, en UNICEF um allan heim leggur áherslu á þátttöku barna og ungmenna í fjölmiðlum á þeim degi.

Þættir um Barnasáttmálann á Rás 1

Börn og ungmenni voru í forgrunni á báðum rásum Ríkisútvarpsins helgina 1.-3.mars 2009. Í framhaldi Fréttaritaraþjálfunarinnar ákváðu UNICEF og Rás 1 að sameinast um gerð útvarpsþáttaraðar ungmenna um Barnasáttmálann.

Fréttaritaraþjálfun unga fólksins

Fréttaritaraþjálfun unga fólksins fór fram í mars og apríl 2009 í Reykjavík, á Ísafirði og á Egilsstöðum. Um var að ræða þriggja daga vinnusmiðju fyrir unga og áhugasama „fréttaritara“ úr 8., 9. og 10. bekk þar sem ungmennin fengu þjálfun í að koma hugmyndum og skoðunum sínum á framfæri í fjölmiðlum. Í vinnusmiðjunni unnu fréttaritararnir ungu útvarpspistla og blaðagreinar fyrir RÚV og Morgunblaðið, en sex útvarpspistlar og sex blaðagreinar eftir 45 þátttakendur voru birtar í þessum miðlum. Eftir vinnusmiðjuna töldu hundrað prósent þátttakenda hana hafa verið gagnlega.

Ungmennaráð

Í 12. grein Barnasáttmálans er kveðið á um að börn eigi að hafa áhrif á málefni sem þau varða. UNICEF á Íslandi leitast við að fara fram með góðu fordæmi og er ungmennaráð starfandi við landsnefndina sem hefur tækifæri til að hafa áhrif á stefnu hennar og ákvarðanir, ásamt því að framkvæma eigin verkefni.

Hlutverk ungmennaráðs er að vera til ráðgjafar fyrir UNICEF á Íslandi og gegnir einnig lykilhlutverki í að virkja börn og ungmenni til starfa í þágu réttinda barna hérlendis sem og erlendis.

Í ungmennaráði geta setið allt að 15 manns á aldrinum 13-18 ára (við inngöngu í ráðið).

Ef þú hefur áhuga á að taka þátt í starfi ungmennaráðs hafðu endilega samband við Bergstein Jónsson í síma 552 6306 eða sendu fyrirspurn á bergsteinn hjá unicef.is.