Þú ert hér:
1. Virðing fyrir friðhelgi og persónufrelsi styrkveitenda
1.1. Styrkveitanda skal aldrei finnast að hann/hún hafi ekki gefið af fúsum og frjálsum vilja. Ef vafi leikur á að gjöf eða styrkur sé gefinn af fúsum og frjálsum vilja, skal hann afþakkaður.
1.2. Við söfnun í hóp sem þekkist innbyrðist skal mikið tillit tekið til aðstæðna hvers einstaklings til að félagslegur þrýstingur ráði ekki ferðinni þegar gefið er.
1.3. Ekki má nýta sér veikleika í fari og/eða högum mögulegs styrkveitenda, t.d. með því að nálgast hann/hana stuttu eftir dauðsfall nærstandenda
1.4. Við símasöfnun skal þeim sem hringt er í og/eða þeim sem hringir, sýnd tilhlýðileg virðing. Samtalinu skal ávallt hætt þegar sá sem hringt er í óskar þess.
1.5. Þegar gengið er í hús við söfnun, má ekki stíga óboðinn inn fyrir þröskuld.
1.6. Ef styrkveitandi lætur skilyrði fylgja gjöf sinni, skulu þau virt – ellegar skal gjöfin afþökkuð, nema ef styrkveitandi fellst á að breyta skilyrðum sínum.
1.7. Ef samtökin óska eftir að gefa upp persónuupplýsingar styrkveitenda skal samþykki hans/hennar leitað ef við verður komið.
1.8. Ef einhver tekur fram að hann/hún vilji ekki að samtökin hafi við sig frekara samband, skal það virt.
1.9. Persónuupplýsingar styrkveitenda skal ekki veita öðrum án samþykkis viðkomandi.
2. Stjórnunar- og lagaleg atriði
2.1. Samtökin skulu ávallt hafa íslensk lög og grundvallarmannréttindi í heiðri við skipulagningu og framkvæmd fjáraflanna, ásamt því að sjá til þess að haldnar séu reglur þær og leyfi sem þriðji aðili (s.s. lögregla og/eða sveitarfélög) fer fram á að skuli uppfylltar.
2.2. Allir þeir fjármunir sem UNICEF á Íslandi áskotnast skulu renna til að uppfylla markmið UNICEF.
2.3. Öll fjársöfnun skal framkvæmd til að uppfylla markmið UNICEF.
2.4. Ef kostnaður við gjöf er í ójafnvægi við stærð hennar, skal hún afþökkuð.
2.5. Ef gjöfin/varan/þjónustan er ekki nýtanleg, ber að afþakka hana.
2.6. Allar opinberar fjársafnanir, hverra uppgjör eru birt opinberlega, skulu vera aðgreindar og vel sýnilegar í ársreikningi.
2.7. Ef fjár er aflað meðal barna, og/eða börn notuð sem fjársafnarar, skal rökstuðningur fundinn fyrir því í hverju tilviki fyrir sig.
2.8. Hvað ráðningu barna viðkemur, skal farið eftir gildandi löggjöf.
2.9. Ef UNICEF á Íslandi stofnar til samstarfs við utanaðkomandi aðila, skulu báðir aðilar setja niður fyrir sér öll þau skilyrði og forsendur sem samstarfið ber með sér.
2.10. Móta skal stefnu um réttindi, skyldur og verkefni sjálfboðaliða sem starfa fyrir UNICEF.
2.11. UNICEF á Íslandi gerir kröfur til samstarfsaðila og undirverktaka með tilliti til launastefnu, framleiðsluaðferða, vinnuskilyrða, umhverfismála o.fl. með hliðsjón af stefnu UNICEF og Sameinuðu þjóðanna í þeim málaflokkum.
3. Miðlun og mótun upplýsinga
3.1. Ekki má birta villandi og/eða tvíræðar upplýsingar.
3.2. Ef söfnun á fötum eða öðrum vörum rennur ekki beint til þurfandi, heldur er t.d. selt fyrst, skal það tekið fram.
3.3. Ef óvissa ríkir um hvort tiltekið verkefni verði framkvæmt, skal það upplýst ásamt því í hvað fjármunirnir verða notaðir í staðinn.
3.4. Ef verkefni hefur hámarks fjármögnunarupphæð, skal upplýst um hvað UNICEF á Íslandi munu gera fyrir alla þá fjármuni sem safnast eftir að hámarksupphæðinni hefur verið náð.
3.5. Upplýsingar um söfnunarleiðir samtakanna skulu vera aðgengilegar.
3.6. Ef setningin „söfnunarféð rennur óskipt til...“ er notuð, skal vera mögulegt að færa sönnur á það.
3.7. Ávallt skal skýrt tekið fram hvort að fjársöfnunin er almenn (til handa UNICEF) eða með ákveðið markmið. Ef dæmi um ákveðin verkefni eru notuð til að varpa ljósi á almenna starfsemi UNICEF skal skýrt tekið fram að um dæmi er að ræða.
3.8. Ef um ákveðið söfnunarmarkmið er að ræða, skal það kynnt með fullnægjandi verkefnislýsingu, sem gefur raunsanna mynd af því hvernig fjármunirnir verða nýttir og hvaða land, þjóðfélagshóp og verkefni um er að ræða.
3.9. Í upplýsingum sem fylgja beiðni um styrk skal tekið fram að ekki sé um skuld eða vörureikning að ræða. Ekki má senda neitt sem líkist vörureikningi með vöru sem hefur ekki verið pöntuð – jafnvel þótt að upplýst sé að varan sé gjöf sem má eiga, henda eða skila, allt eftir ósk viðkomandi.
3.10. Myndmál og texti verður að falla að hinum raunverulegu aðstæðum sem lýst er, og eru markmið fjársöfnunarinnar. Tengslu skulu ríkja á milli þeirra dæma sem tekin eru og markmiðs fjársöfnunarinnar.
3.11. Ef slík dæmi eru notuð, skulu samtökin biðja um samþykki frá viðkomandi einstaklingum/hópum, ef mögulegt er.
3.12. Ekki má notast við ummæli, nöfn, tilvitnanir, hugtök eða myndefni sem eru fjársöfnuninni óviðkomandi.
3.13. Fjalla skal um fólk af virðingu í myndmáli og texta.
3.14. Nafn samtakanna og merki ásamt almennum markmiðum, skulu ávallt vera sýnileg í fjársöfnunargögnum.
3.15. Ef fleiri samtök safna fé í sameiningu, skulu nöfn þeirra allra og merki koma fram í fjársöfnunargögnunum.
3.16. Ef fleiri samtök safna fé í sameiningu, skal skipting söfnunarfésins liggja ljós fyrir á opinberum vettvangi.
3.17. Ef fleiri samtök safna fé í sameiningu, skal liggja ljóst fyrir hvernig hver og ein samtök hyggjast verja söfnunarféinu.
3.18. Í götukynningum, þegar gengið er í hús og í viðlíka persónulegum samskiptum þar sem mögulegir gefendur þekkja ekki fjársafnara, skal fjársafnari bera sýnilegar persónuupplýsingar með merki UNICEF og eigin nafni.
3.19. Í símasöfnun skal fjársafnarinn upplýsa um nafn UNICEF á Íslandi ásamt því að geta nefnt á nafn tengilið á skrifstofu ef óskað er.
3.20. Í götukynningum, þegar gengið er í hús, og í símasöfnunum skal hver og einn fjársafnari geta upplýst um markmið UNICEF ásamt því í hvað söfnunarféð muni renna.
3.21. Söfnunarbaukar skulu tæmdir í nærveru minnst tveggja aðila.
4. Stefna UNICEF á Íslandi varðandi CRM (Cause-related marketing)
4.1. Hvað er átt við með CRM?
Samstarfsaðili selur tiltekna vöru og rennur hluti af ágóðanum til styrktar UNICEF. UNICEF ber engan kostnað af hönnun, framleiðslu eða sölu vörunnar.
4.2. Merking
Vakin skal athygli á því að UNICEF njóti góðs af sölunni og skal koma skýrt fram með hvaða hætti (t.d. að X krónur af söluvirði vörunnar renni til UNICEF). Einkennismerki UNICEF má koma fram á umbúðum vörunnar, sé það viðeigandi en skal þó aldrei vera hlutfallslega stærra en einkennismerki samstarfsaðilans. Þá skal einkennismerki UNICEF koma á eftir einkennismerki samstarfsaðila (einnig til að vekja athygli á að samstarfsaðili á frumkvæði að samstarfinu).
4.3. Kynning
Verði framleiðslan kynnt með einhverjum hætti, t.a.m. með útgáfu kynningarbæklings, skal skýrt tekið fram að kostnaður vegna hönnunar, framleiðslu og sölu vörunnar sé greiddur af samstarfsaðilanum og að tryggt verði að hluti ágóða vegna sölu þeirra renni óskiptur til UNICEF á Íslandi.
Samstarfsaðilinn skal hafa samstarf við UNICEF á Íslandi varðandi kynningarmál. Samstarfsaðilinn skal nálgast allar upplýsingar um UNICEF hjá UNICEF á Íslandi.
4.4. Sala
UNICEF kemur ekki að sölu vörunnar með beinum hætti.
4.5. Framleiðsluferli
Samstarfsaðilinn skal leitast við að tryggja að ekkert í framleiðsluferli vörunnar varpi skugga á gott orðspor UNICEF, þ. á m. að hún sé ekki framleidd af börnum í þrælkunarvinnu.
4.6. Gildistími
Tryggja skal að komi eitthvað upp á sem skyggir á gott orðspor UNICEF sé UNICEF á Íslandi heimilt að segja samningnum upp án fyrirvara.
4.7. Annað
UNICEF á Íslandi mun ekki hygla samstarfsaðila á neinn hátt, s.s. með að mæla með annarri vöru sem framleidd er eða seld af samstarfsaðila.
