Opin námskeið

Akademíunnar

Námskeið UNICEF Akademíunnar eru opin öllum sem hafa áhuga á að fræðast um réttindi barna. Það er markmið UNICEF á Íslandi að gera fræðslu um réttindi barna skiljanlega og aðgengilega bæði börnum og fullorðnum. Öll námskeið UNICEF Akademíunnar byggja á Barnasáttmála Sameinuðu þjóðanna sem var lögfestur á Íslandi árið 2013. Eitt af ákvæðum sáttmálans er einmitt að öll verðum við að þekkja réttindi barna.

Réttindafræðsla er öflugasta leiðin að aukinni virðingu fyrir mannréttindum. Með aukinni þekkingu barna á eigin réttindum virða þau frekar réttindi annarra barna. Og með aukinni þekkingu fullorðinna á réttindum barna eru vernd þeirra, umönnun og þátttaka betur tryggð.

Barnasáttmálinn - Inngangur

Á þessu námskeiði lærir þú um mannréttindi og hvers vegna þörf er á sérstökum mannréttindasáttmála fyrir börn. Námskeiðið gagnast öllum sem vilja standa vörð um réttindi barna. Þú lærir líka um merkilega áfanga í baráttunni fyrir mannréttindum barna og færð innsýn í sögulegt samhengi þeirra. Þegar þú hefur lokið námskeiðinu þekkir þú skyldur stjórnvalda og fullorðinna gagnvart réttindum barna, veist hvernig allar greinar Barnasáttmálans tengjast og hvernig barnaréttindanálgun er beitt.