27. desember 2019 „Eftir níu ár af stríði halda börn í Sýrlandi áfram að upplifa ólýsanlegt ofbeldi, áföll og þjáningar,“ segir Ted Chaiban, yfirmaður UNICEF í Mið-Austurlöndum og Norður-Afríku. Átök hafa farið harðnandi í norðvesturhluta Sýrlands að undanförnu og sem fyrr eru það börn, sá hópur sem síst skyldi, sem bera þungan af því.
„Meira en 500 börn létu lífið eða særðust í átökum í norðvesturhluta Sýrlands á fyrstu níu mánuðum þessa árs,“ segir Chaiban og bendir á að desembermánuður nú hafi verið einstaklega blóðugur þar sem að minnsta kosti 65 börn hafi látið lífið eða særst.
Bardagar hafa undanfarið geisað í þéttbýlum svæðum Ma‘arat An-Nu‘man, sunnan Idlib-borgar, sem hafa neytt þúsundir fjölskyldna til að flýja heimili sín norður. Frá 11. desember hafa rúmlega 130 þúsund manns, þar af rúmlega 60 þúsund börn, flúið heimili sín í sunnanverðri Idlib, norðanverðri Hama og vestanverðri Aleppo vegna harðnandi átaka.
„Þessi fólksflutningar hafa sett aukið álag á gestgjafasamfélögin og yfirfullar neyðarbúðir,“ segir Chaiban. „Margar fjölskyldur hafa ekki enn fundið húsaskjól og sofa því undir berum himni.“
„Þessi harðnandi átök og vergangur fólks nú kemur á tíma þegar hitastig á þessum svæðum lækkar hratt, það rignir og flóð eru tíð. Börn sem búa í búðum og öðrum illa einangruðum húsakosti eru úrvinda eftir ótal ferðalög og flótta í kuldanum. Þau eru berskjölduð fyrir veikindum og dauða.“
Chaiban segir að viðhalda verði mannúðaraðstoð á svæðunum svo hægt sé að koma þessum hundruð þúsunda barna um norðvesturhéruðin sem og annars staðar í Sýrlandi til bjargar.
„Það verður að verja börn öllum stundum, líka á átakatímum. Það er ófrávíkjanleg skylda stríðandi aðila, ekki bara val hverju sinni. UNICEF krefst þess að stríðandi fylkingar leiti friðsamlegra úrlausna og setji börnin í fyrsta sætið í eitt skipti fyrir öll.“
Heimsforeldrar taka virkan þátt í baráttu UNICEF um allan heim og leggja sitt að mörkum svo UNICEF nái markmiðum sínum. Á Íslandi eru yfir 27.000 heimsforeldrar sem hjálpa UNICEF í verkefnum sínum með mánaðarlegum framlögum.
Þú getur skráð þig sem Heimsforeldri hér.
"}}}]},"loginpage":null}},"pageContext":{"language":"is","prismicId":"X3S35hIAACQA1L4A"}},"staticQueryHashes":["1216418271","2681192219","2999785817","675757224"]}