01. febrúar 2022

Catherine Russell er nýr framkvæmdastjóri UNICEF

„Það er mikill heiður og forréttindi að ganga til liðs við UNICEF og leggja mitt af mörkum til að leiða ótrúlegt starf stofnunarinnar fyrir börn um allan heim

Gleði á undirituninni áðan. Gaman að fá Réttindaskóla hingað til lands og hefja spennandi tilraunaverkefni!

1. febrúar 2022 „Það er mikill heiður og forréttindi að ganga til liðs við UNICEF og leggja mitt af mörkum til að leiða ótrúlegt starf stofnunarinnar fyrir börn um allan heim á svo mikilvægum tímapunkti í sögunni,“ segir Russell í tilkynningu.

Tilkynnt var um ráðningu Russell í desember síðastliðnum en hefur hún nú formlega verið sett í embætti og tekur þar með við af Henriettu Fore sem gegnt hafði starfinu frá því í ársbyrjun 2018 við góðan orðstír. Fore hafði beðist lausnar úr embætti í ágúst síðastliðnum af persónulegum ástæðum vegna veikinda eiginmanns hennar.

Catherine Russell hefur víðtæka reynslu af stjórnunarstörfum í bandaríska stjórnkerfinu og kemur með mikla sérfræðiþekkingu inn í starf UNICEF. Frá 2020 til 2022 var hún aðstoðarmaður forseta Bandaríkjanna og skrifstofustjóri starfsmannamála forsetans í Hvíta húsinu. Þar áður hafði hún frá árinu 2013 til 2017 verið sendiherra fyrir Global Women‘s Issues í utanríkisráðuneyti Bandaríkjanna. Í þeirri stöðu bar hún ábyrgð á að innleiða hagsmuna-, réttinda- og baráttumál kvenna í alla þætti utanríkisstefnu Bandaríkjanna, var fulltrúi Bandaríkjanna í yfir 45 löndum, vann með erlendum stjórnvöldum, alþjóðasamtökum og félögum í almannaþágu. Þá var hún í forsvari fyrir innleiðingu framtaksins „U.S Global Strategy to Empower Adolescent Girls“ sem þykir mikið tímamótastefnumál.

Þar áður hafði hún starfað sem staðgengill aðstoðarmanns Bandaríkjaforseta í tíð Baracks Obama, yfirráðgjafi utanríkismálanefndar öldungadeildar Bandaríkjaþings í alþjóðlegum málefnum kvenna svo fátt eitt sé nefnt.

„Á tímum sem þessum þar sem milljónir barna standa frammi fyrir því að takast á við afleiðingar heimsfaraldurs Covid og annarra erfiðleika er UNICEF í fremstu röð til að verja réttindi þeirra og framtíð. Ég hlakka mikið til vinnunnar sem framundan er,“ segir Russell í tilkynningu frá UNICEF.

Catherine Russell er áttundi framkvæmdastjóri í sögu UNICEF, Barnahjálpar Sameinuðu þjóðanna og býður landsnefnd UNICEF á Íslandi hana hjartanlega velkomna til starfa.

Fleiri
fréttir

08. júlí 2024

Yfirlýsing UNICEF vegna árása í Úkraínu
Lesa meira

03. júlí 2024

10 ár af neyð: Gleymdu börnin í Mið-Afríkulýðveldinu
Lesa meira

01. júlí 2024

Átta leikskólar fengu viðurkenningu sem Réttindaskólar UNICEF 
Lesa meira
Fara í fréttasafn