Söfnunarreikningur fyrir frjáls framlög er: 701-26-102020 Kennitala: 481203-2950.

UNICEF, Barnahjálp Sameinuðu þjóðanna, kallar eftir tafarlausu vopnahléi í Súdan þar sem hörð átök síðustu daga hafa kostað fjölda barna og óbreytta borgara lífið.

Catherine Russel, framkvæmdastjóri UNICEF, segir að átökin hafi haft skelfilegar afleiðingar á mannúðarstarf í Súdan og meðal annars raskað umönnun 50 þúsund alvarlega vannærðra barna sem þurfa aðhlynningu allan sólarhringinn. Þá ógni átökin svokallaðri kaldri keðju UNICEF sem tryggir örugga dreifingu bóluefna og annarra lyfja sem þarfnast kælingar, þar sem raforkuöryggi er lítið og víða er ómögulegt að fylla á eldsneytisbirgðir fyrir vararafstöðvar.

Borgarastríðið hefur haft mikil áhrif á starf UNICEF. Nær allir alþjóðlegir starfsmenn hafa verið sendir úr landi og það hafa verið gerðar árásir á vöruhús og vöruflutninga. Súdanskir starfsmenn halda þó áfram störfum þrátt fyrir mikla hættu. Áherslan er fyrst og fremst lögð á að grunnþjónustan við börn haldi áfram: aðgengi að hreinu vatni, næringu og menntun. Allir skólar í Súdan eru lokaðir á þessari stundu, en það eykur líkurnar á því að börn verði fyrir ofbeldi eða hreinlega skikkuð í hermennsku.

UNICEF hefur lagt aukna áherslu á aðstoð við fylgdarlaus börn og fjölskyldur á flótta í Súdan og nágrannaríkjum. Með þínum stuðningi hjálpar þú UNICEF að tryggja börnum í Súdan hreint vatn, næringu, heilbrigðisþjónustu og frekari neyðaraðstoð sem þau þurfa á að halda.