Starfsfólk UNICEF á Íslandi

Stefán Ingi Stefánsson leiddi undirbúning að stofnun landsnefndar UNICEF á Íslandi árið 2003 og hefur verið framkvæmdastjóri frá formlegri stofnun hennar í mars 2004. Hann stundaði nám í sjúkraþjálfun við Háskóla Íslands og starfaði á Landsspítala Háskólasjúkrahúsi og Bata-sjúkraþjálfun áður en hann hóf störf hjá UNICEF. Stefán hefur starfað víða á alþjóðlegum vettvangi og hefur meðal annars gegnt starfi formanns alþjóðlegrar hugveitu UNICEF um fjáraflanir árið 2010. Þar að auki hefur Stefán hlaupið átta maraþon. 

Bergsteinn Jónsson verkefnastjóri hefur unnið hjá UNICEF á Íslandi síðan í október 2006 og annast öll verkefni UNICEF á Íslandi sem ekki snúa að kynningarmálum og fjáröflun, meðal þeirra eru réttindagæsla barna á Íslandi og framkvæmd þróunarverkefna erlendis. Bergsteinn er menntaður mannfræðingur frá Háskóla Íslands og stundaði framhaldsnám í alþjóðlegum þróunarfræðum og samskiptum menningarheima við Hróarskelduháskóla. Bergsteinn er tveggja barna faðir og kemst út á videoleigu og til baka á hjólabretti. 

Bryndís Lúðvíksdóttir er í hálfu starfi sem fjáröflunarfulltrúi UNICEF á Íslandi auk þess að sjá um samskipti við banka og að framlög nærri 22 þúsund heimsforeldra skili sér með öruggum hætti til UNICEF. Áður starfaði Bryndís hjá Kaupþingi í fjölda ára og var m.a. deildarstjóri lánadeildar bankans. Bryndís á þrjú uppkomin börn og haug af barnabörnum. 

Dröfn Guðmundsdóttir starfar í hálfu starfi sem fjármálastjóri UNICEF á Íslandi frá því í ágúst 2006. Hún er menntaður meinatæknir frá Kaupmannahöfn og starfaði sem fjármálastjóri í eigin fyrirtæki áður en hún hóf störf hjá UNICEF. Dröfn á tvö uppkomin börn, er mikil laxveiðikona og hefur dálæti á öllu því sem ítalskt er.

Flóki Guðmundsson fjáröflunarstjóri hefur starfað hjá UNICEF á Íslandi frá árinu 2007. Áður en leið hans lá til UNICEF starfaði hann m.a. sem blaðamaður og kennari. Flóki er með meistarapróf í heimspeki frá St Andrews í Skotlandi. Flóki er tveggja dætra faðir og mikill hlaupagikkur.

Jóhanna Guðmundsdóttir hefur starfað hjá UNICEF á Íslandi frá árinu 2008. Hún hóf ferilinn sem hópstjóri götukynna og starfar nú sem fjáröflunarfulltrúi. Jóhanna er með BA próf í mannfræði og kennsluréttindum við Háskóla Íslands. Hún mikill sjálfboðamógúll og var stjórnarformaður í AUS (Alþjóðleg ungmennaskipti). 

Sigríður Víðis Jónsdóttir tók við starfi upplýsingafulltrúa UNICEF á Íslandi í lok mars 2011. Hún lærði heimspeki og mannfræði við Háskóla Íslands og lauk síðan framhaldsnámi í þróunarfræði við University of East Anglia. Sigríður vann áður við fjölmiðla og gaf árið 2011 út verðlaunabókina Ríkisfang: Ekkert.

Lovísa Arnardóttir skrifaði skýrslu á vegum UNICEF á Íslandi árið 2011 um stöðu barna á Íslandi. Hún er með meistaragráðu í mannréttindafræðum frá UCL  og sér um innanlands- og réttindamál barna á Íslandi í hálfu starfi innan verkefnadeildar UNICEF. Lovísa er með einstaklega fallegt, þykkt og mikið hár.