UNICEF trúir því að börn þurfi vernd, öryggi og umhyggju. Við erum staðráðin í að veita hverju barni þá barnæsku sem það á skilið, þ.e. tækifæri til að leika sér, læra og láta sig dreyma. Á hverjum degi snertum við líf bágstaddra barna í yfir 150 löndum.

Við veitum börnum menntun, heilsugæslu og vernd gegn ofbeldi, misnotkun og sjúkdómum. Við erum einnig stærsti kaupandi bóluefna og malaríuneta í heiminum. Þegar neyð skellur á af völdum náttúruhamfara eða stríðs erum við ein af þeim fyrstu til að veita hjálp og björgum þannig lífi þúsunda barna.

Með því að gerast heimsforeldri UNICEF tekur þú þátt í þessum mikilvægu verkefnum með okkur og færir börnum um allan heim gleði og von.

HEIMSFORELDRAR eru öflugt stuðningsnet fyrir börn um allan heim sem þú getur orðið hluti af með einföldum hætti. Sem HEIMSFORELDRI greiðir þú 1000 krónur eða meira á mánuði. Það munar um hvert framlag og þú getur verið viss um að framlag þitt skili sér til barna sem þurfa á því að halda.

Athugið að sem heimsforeldri styður þú ekki við eitt ákveðið barn heldur renna framlög þín til verkefna sem gagnast mörgum börnum. Þú stjórnar framlagi þínu og getur hækkað og lækkað það að vild.

Kíktu á skráningarsíðu okkar eða hringdu í síma 562 62 62 og skráðu þig núna. Þú ert óskaforeldri barna um allan heim!

Við hjá UNICEF á Íslandi leggjum okkur fram við að veita HEIMSFORELDRUM góðar upplýsingar um hvernig framlögunum er varið til verkefna fyrir börn. Þrisvar á ári sendum við þér fréttir af starfi HEIMSFORELDRA um allan heim, auk ársyfirlits í byrjun hvers árs.

Sem heimsforeldri getur þú ...

• séð til þess að ungabörn fái nauðsynlega næringu, umhyggju, bólusetningar og heilsugæslu,
• veitt börnum, jafnt stelpum sem strákum, góða grunnmenntun,
• frætt börn og ungmenni um réttindi sín og gefið þeim tækifæri á að láta rödd sína heyrast,
• fyrirbyggt HIV-smit, veitt smituðum umönnun og séð til þess að börnum sem eru munaðarlaus af völdum alnæmis, sé veittur stuðningur,
• verndað börn gegn stríði, ofbeldi, misnotkun og vinnuþrælkun.

Með framlagi sínu vinna heimsforeldrar kraftaverk á hverjum einasta degi. Verkefnin eru ærin, en það er árangurinn líka!