24. apríl 2023

Nemendur Verzló söfnuðu fyrir börn í Úkraínu

Frumleg og skemmtileg fjáröflun í góðgerðarviku skólans skilaði 900 þúsund krónum í neyðarsöfnun UNICEF á Íslandi

Góðgerðarráð Verzlunarskóla Íslands með Birnu Þórarinsdóttur, framkvæmdastjóra UNICEF á Íslandi

UNICEF á Íslandi fékk heldur betur frábæra heimsókn á dögunum frá nemendum Verzlunarskóla Íslands sem komin voru til að afhenda afrakstur góðgerðarviku skólans þar sem safnað var fyrir börn í Úkraínu.

Óhætt er að segja að fjáröflunarleiðir nemenda hafi verið ótrúlega frumlegar og skemmtilegar þar sem mörg lögðu greinilega mikið á sig fyrir gott málefni með margvíslegum áskorunum.

Meðal annars gistu nokkrir piltar á þriðja ári alla vikuna í nemendaskjallara skólans, tveir nemendur unnu heilan skóladag við afgreiðslu og undirbúning í Matbúð og stúlka á öðru ári var heilan dag á hjólaskautum. Þrjár stúlkur söfnuðu áheitum með því að ganga í skólann alla leið frá Kjalarnesi, alls 25 kílómetra, tveir nemendur á þriðja ári fengu sér húðflúr og einn nemandi litaði hárið á sér bleikt.

Þá var einnig boðið upp á happdrætti, lukkuhjól og sölu veitinga.

Árangurinn var sannarlega glæsilegur en fulltrúar úr góðgerðaráði skólans afhentu alls 900 þúsund krónur í neyðarsöfnun UNICEF á Íslandi vegna Úkraínu.

UNICEF á Íslandi færir nemendum Verzlunarskóla Íslands og öllum sem styrktu söfnunina hjartans þakkir fyrir stuðninginn.  Þvílíkir snillingar.

Fleiri
fréttir

08. júlí 2024

Yfirlýsing UNICEF vegna árása í Úkraínu
Lesa meira

03. júlí 2024

10 ár af neyð: Gleymdu börnin í Mið-Afríkulýðveldinu
Lesa meira

01. júlí 2024

Átta leikskólar fengu viðurkenningu sem Réttindaskólar UNICEF 
Lesa meira
Fara í fréttasafn