25. september 2019 „Nú þegar við fögnum 30 ára afmæli Barnasáttmála Sameinuðu þjóðanna skulum við ekki einungis skuldbinda okkur til að hlusta á börn og ungt fólk. Heldur styðja þau, taka slaginn með þeim og fylgja þeirra fordæmi,“ sagði Henrietta Fore, framkvæmdastjóri UNICEF, í athöfn tileinkaðri 30 ára afmæli Barnasáttmálans í New York í dag.

Í áhrifamikilli ræðu sinni rifjaði Fore upp að fyrir þremur áratugum hafi heimurinn verið að breytast mikið. Berlínarmúrinn var að falla, aðskilnaðarstefnan á undanhaldi og veraldarvefurinn að verða til. Það var í þessu andrúmslofti sem þjóðarleiðtogar hafi komið saman og gefið öllum börnum heimsins loforð. Að þau ættu rétt á heilbrigðisþjónustu, menntun og vernd. Rétt til að láta rödd sína heyrast. Rétt á framtíð.

Fore talaði um að mikill árangur hafi náðst en minnti einnig á, líkt og á dögunum, hvaða áskoranir börn standi frammi fyrir í dag árið 2019. Barnæskan væri að breytast og það þyrftum við líka að gera. En börn og ungmenni væru að gera frábæra hluti á borð við loftslagsverkföll, mótmæli, kröfugöngur og baráttu fyrir friði sem hinum fullorðnum bæri ekki aðeins að taka eftir heldur styðja þau í.