08. júní 2023

UNICEF: Hundruð munaðarlausra barna flutt í öruggt skjól í Súdan

UNICEF aðstoðaði við að setja upp örugga flutningamiðstöð til að taka við börnunum og veitir þeim nauðsynlega umönnun og aðhlynningu

297 börn hafa verið flutt frá Mygoma munaðarleysingjaheimilinu í Khartoum í Súdan í öruggt skjól frá harðvítugum átökum á svæðinu. Mandeep O'Brien, fulltrúi UNICEF, Barnahjálpar Sameinuðu þjóðanna, í Súdan segir hina vel heppnuðu flutninga ljós í myrkri fyrir hinn viðkvæma hóp barna sem á heimilinu bjó við hættulegar aðstæður.

 „Milljónir barna eru enn í bráðri hættu víðs vegar um Súdan og hin hörðu átök, miklu fólksflutningar og skortur á aðgengi að mannúðaraðstoð ógna lífi þeirra á hverjum degi,“ segir O'Bien.

Börnin á Mygoma-heimilinu eru á framfæri félags- og heilbrigðismálayfirvalda í Súdan með stuðningi UNICEF. Barnahjálpin aðstoðaði við að setja upp örugga flutningamiðstöð til að taka við börnunum og veitir þeim nauðsynlega umönnun og aðhlynningu auk þess að styðja við umönnunaraðila barnanna. Vinna er þar að auki hafin, í samstarfi við viðkomandi yfirvöld, við að finna fósturfjölskyldur fyrir börnin. 

Síðan hin mannskæðu átök hófust í Súdan í apríl síðastliðnum eru 13,6 milljónir barna í neyð og þurfa á mannúðaraðstoð að halda. Þetta er mesti fjöldi barna í neyð í ríkinu frá upphafi. UNICEF, Barnahjálp Sameinuðu þjóðanna, kallar eftir 838 milljónum dala til að takast á við þá miklu neyð í Súdan.

Þú getur styrkt neyðarsöfnun UNICEF á Íslandi fyrir börn í Súdan hér.

Fleiri
fréttir

08. júlí 2024

Yfirlýsing UNICEF vegna árása í Úkraínu
Lesa meira

03. júlí 2024

10 ár af neyð: Gleymdu börnin í Mið-Afríkulýðveldinu
Lesa meira

01. júlí 2024

Átta leikskólar fengu viðurkenningu sem Réttindaskólar UNICEF 
Lesa meira
Fara í fréttasafn