Á síðasta ári var fjáröflunarverkefninu UNICEF-verndarar ýtt úr vör. Um er að ræða verkefni sem lítil og meðalstór fyrirtæki á Íslandi leggja lið með mánaðarlegum fjárframlögum. Rennur styrkur fyrirtækjanna til uppbyggingar menntunar í hinum sárfátæku Vestur-Afríkuríkjum Síerra Leóne og Gíneu-Bissá.

Af þessu tilefni hefur listamaðurinn Tolli málað 100 „skólabyggingar“. Um er að ræða lítil pappahús og munu þau rúmlega 60 fyrirtæki sem þegar hafa gerst UNICEF-verndarar fá eitt hús hvert - til staðfestingar á stuðningi sínum. Húsin 40 sem eftir standa bíða svo nýrra verndara. Húsin eru táknræn að því leyti að fjárstyrkur UNICEF-verndara rennur m.a. til uppbyggingar skólahúsnæðis, auk þjálfunar kennara, kaupa á nauðsynlegum skólagögnum o.fl.

Sýning á húsum Tolla stendur yfir dagana 18.-25. apríl og er í samstarfi við Saltfélagið. Tolli hefur gefið UNICEF, Barnahjálp Sameinuðu þjóðanna, vinnu sína og efniskostnað.

Um UNICEF-verndara
Að bjóða litlum og meðalstórum fyrirtækjum að borga reglulega til góðgerðarmála með þessum hætti hefur ekki verið áður reynt á Íslandi. Hins vegar hefur þessi leið verið reynd á vegum UNICEF í Danmörku með mjög góðum árangri. Nú bætist UNICEF á Íslandi í hópinn og er það von samtakanna að íslensk fyrirtæki taki vel í þessa nýju fjáröflunarleið. Þegar eru rúmlega 60 fyrirtæki UNICEF-verndarar.

Styrkur UNICEF-verndara rennur til menntaverkefna UNICEF í tveimur af fátækustu löndum heims. Í Vestur-Afríku fer um 50% barna á mis við grundvallarmenntun eins og lestur og skrift og er hvergi í heiminum hærra hlutfall barna án menntunar. Íslensk fyrirtæki munu því leggja sitt af mörkum þar sem neyðin er stærst.

Með stuðningi UNICEF-verndara verður hægt að byggja skóla, þjálfa kennara og útvega skólabækur og ritföng, auk skólabekkja og krítartaflna. Það er staðreynd að menntun er besta leiðin til að rjúfa vítahring fátæktar.