Rúmlega 1,7 milljón barna búa nú við afleiðingar og áhrif þess að ofurfellibylurinn Fung-wong gekk yfir Filippseyjar þann 9. nóvember síðastliðinn. Frá þessu greinir UNICEF, Barnahjálp Sameinuðu þjóðanna í dag.

Heimili, skólar og aðgengi að heilbrigðisþjónustu í 16 umdæmum eyjaklasans varð fyrir miklum áhrifum eyðileggingarmáttar Fung-wong. Fellibylurinn stóri var ein af mörgum loftslagstengdum áföllum og náttúruhamförum sem dunið hafa á íbúum á þessu ári.

„Börn og fjölskyldur eru vart stigin upp úr einni krísu áður en sú næsta skellur á og kastar þeim aftur á byrjunarreit,“ segir Kyungsun Kim, fulltrúi UNICEF í Filippseyjum. „Og sem fyrr þegar heimsbyggðin stendur frammi fyrir sífellt öfgafyllri loftslagstengdum hamförum þá eru það ávallt börnin sem verða verst úti.“

Áhrif veðurofsans á mikilvæga innviði gera setja svo aftur börn og fjölskyldur í aukna hættu á hvers kyns smitsjúkdómum

UNICEF hefur ásamt samstarfsaðilum og stjórnvöldum þegar hafið greiningu á þörfum íbúa er varðar vatns- og hreinlætisverkefni, heilbrigðisþjónustu, næringu, menntun og barnavernd auk þess sem neyðarhjálpargögn sem þegar voru til staðar í vöruhúsum UNICEF í Manila og Cotabato eru á útleið til dreifingar þangað sem þörfin er mest.

UNICEF mun einnig útvega og dreifa næringarfæði til að tryggja að börn sem fyrir glímdu við vannæringu haldi áfram að fá nauðsynlega meðferð.

UNICEF, Barnahjálp Sameinuðu þjóðanna, er alltaf á vettvangi og til staðar fyrir öll börn.