UNICEF, Barnahjálp Sameinuðu þjóðanna, er á vettvangi á jarðskjálftasvæðunum í Afganistan þar sem áætlað er að minnst þúsund hafi látið lífið og gríðarleg eyðilegging hafi orðið.

UNICEF í Afganistan brást strax við með að senda nauðsynleg hjálpargögn á svæðið á borð við næringu, hreinlætisvörur, vatn, hlýjan fatnað, teppi og neyðarskýli auk þess að senda færanleg heilbrigðisteymi á vettvang.

Mohamed Ayoya, fulltrúi UNICEF í Afganistan, segir að enn sé ekki ljóst að fullu hversu margir hafi látið lífið en ljóst sé að margir hinna látnu séu konur og börn. Mikill fjöldi slasaðist einnig og enn fleiri hafi misst allt sitt í hamförunum. Þegar ráðandi aðilar hafi óskað aðstoðar UNICEF hafi verið brugðist fljótt við.

„Við stöndum með öllum þeim börnum og fjölskyldum þeirra sem eiga um sárt að binda á þessum erfiðu tímum,“ segir Ayoya.