„UNICEF, Barnahjálp Sameinuðu þjóðanna, harmar allt ofbeldi gegn börnum og kallar eftir tafarlausri stöðvun árása. Vernda ber börn öllum stundum og öllum aðilum máls ber samkvæmt alþjóðalögum skylda til að verja almenna borgara– sérstaklega börn í átökum,“ segir Adele Khodr, svæðisstjóri UNICEF í Mið-Austurlöndum og N-Afríku í yfirlýsingu vegna átaka undanfarinna daga í Jenín í Palestínu.

Greint hefur verið frá því að minnst þrjú börn hafi látið lífið á mánudag og fjöldi annarra særst í árásum auk þess sem hundruð fjölskyldna hafi neyðst til að flýja. Í flóttamannabúðunum í Jenín hafa mikilvægir innviðir á borð við vatn og rafmagn raskast verulega.

Khodr segir að síðastu tvö ár hafi síendurtekin átök og árásir blossað reglulega upp í og við Gaza-ströndina sem og á Vesturbakkanum. UNICEF harmar vaxandi átök á Vesturbakkanum, þar á meðal austurhluta Jerúsalem.

„Frá upphafi árs 2023 hafa 33 börn látið lífið, 27 palestínsk og 6 ísraelsk. Þetta eru hærri tölur en sáust allt árið í fyrra sem þó var eitt mannskæðasta ár á Vesturbakkanum síðan 2004. Alvarleg brot gegn börnum, þar á meðal þar sem þau láta lífið eða særast, eru fullkomlega óásættanleg. UNICEF krefst þess að börnum sé hlíft við þessum árásum eins og þau eiga rétt á, sama hver eða hvar þau eru. Besta leiðin til að tryggja öryggi og velferð barna við þessar aðstæður er með friði og tafarlausu vopnahléi,“ segir Khodr.