UNICEF á Íslandi barst glæsilegt framlag frá nemendum 7. BÓ í Ártúnsskóla sem í lok síðasta mánaðar stóðu fyrir árlegri Menningarvöku skólans og söfnuðu þar 150 þúsund krónum fyrir börn í Úkraínu.

Í ár var sett upp metnaðarfull dagskrá sem var byggð á söngleik sem heitir „Manstu ekki eftir mér“ byggð á lögum Stuðmanna. Nemendur sungu, dönsuðu, útbjuggu leikmynd og auglýsingar og sáu um miðagerð og miðasölu með dyggri aðstoð kennara sinna.

Ár hvert er aðgangseyrir látinn renna til góðgerðamála og að þessu sinni ákváðu nemendur í 7. bekk að láta börnin í Úkraínu, sem eiga um sárt að binda, njóta góðs af. Rennur upphæðin því öll í neyðarsöfnun UNICEF vegna Úkraínu.

UNICEF á Íslandi þakkar nemendum í Ártúnsskóla og öllum þeim sem studdu krakkana í verkefninu kærlega fyrir stuðninginn. Kærar þakkir!