Mánuður er nú síðan hernaðaraðgerðir hófust og hörðnuðu í Mið-Austurlöndum. Átök sem halda áfram að taka skelfilegan toll á börnum víðsvegar í heimshlutanum.
Rúmlega 340 börn hafa verið drepin og þúsundir særst á þessum mánuði. Þar af hafa 216 verið drepin og 1767 særst í Íran, 124 drepin og 413 særð í Líbanon, 4 drepin og 862 særð í Ísrael, 1 barn drepið í Kúveit, 4 börn særð í Barein og 1 barn sært í Jórdaníu. Manntjón barna var mest fyrsta dag stríðsins þegar eldflaugaárás á Shajareh Tayyebeh-skólann í Íran varð 168 börnum að bana.
Stanslausar árásir stríðsaðila í mörgum löndum eru að eyðileggja og skemma þá innviði og þjónustu sem börn þurfa nauðsynlega. Eins og sjúkrahús, skóla og vatns- og hreinlætiskerfi.
Á sama tímabili hefur áframhaldandi ofbeldi í Palestínu, þar á meðal á Gaza-ströndinni og Vesturbakkanum, banað 16 palestínskum börnum og sært 50.
Neyðarsöfnun fyrir börn í Mið-Austurlöndum
1,2 milljónir á flótta
„Börn í þessum heimshluta eru að verða fyrir skelfilegu ofbeldi á sama tíma og þau kerfi og þjónusta sem eiga að tryggja öryggi þeirra sæta einnig árásum,“ sagði Catherine Russell, framkvæmdastjóri UNICEF. „Brýnt er að allir aðilar grípi tafarlaust til aðgerða um að vernda líf almennra borgara og virða réttindi barna.“
Í Mið-Austurlöndum hafa yfir 1,2 milljónir barna neyðst til að flýja heimili sín þar sem sprengjuárásir og rýmingarskipanir hafa tæmt heilu samfélögin. Slíku raski fylgir áfall fyrir börn sem eru að missa það sem áður veitti þeim öryggi. Það hefur sýnt sig að það að lifa við langvarandi ofbeldi og óstöðugleika hefur áhrif á þroska heilans, tilfinningastjórn og andlega heilsu barna til lengri tíma.
Áhrif á börn um allan heim og UNICEF bregst við hindrunum
Og átökin hafa áhrif víðar en í Mið-Austurlöndum. UNICEF áætlar að truflanir í innkaupum, framleiðslu og flutningum vegna átakanna geti valdið allt að sex mánaða töfum á afhendingu lífsnauðsynlegra birgða til landa um allan heim. Hækkandi heimsmarkaðsverð á olíu, sem spáð er að hækki um allt að 20%, gæti jafnframt hækkað framleiðslukostnað mikilvægra hjálpargagna. Þar á meðal bóluefna og næringarvara, auk flutningskostnaðar. Að auki auka áskoranir í flutningskeðjum, svo sem þrengsli í höfnum og lengri siglingaleiðir, á vandann, þar sem breytingar á siglingaleiðum geta lengt flutningstíma um allt að fjórar vikur.
Til að bregðast við truflunum í alþjóðlegum aðfangakeðjum tryggir UNICEF áfram stöðugt flæði nauðsynlegra birgða til barna um allan heim með því að virkja aðrar flutningsleiðir í lofti, á landi og sjó, fjölga upprunastöðum lífsnauðsynlegra vara og flýta fyrir innkaupum til að mæta lengri afhendingartíma. Einnig á UNICEF í viðræðum við flutningsaðila til að setja þak á óhófleg aukagjöld og forgangsraða mannúðarhjálp, þannig að þau svæði sem verst hafa orðið úti haldi áfram að fá þann stuðning sem börn þar þurfa á að halda.
Reynt að viðhalda grunnþjónustu
Í Íran, að beiðni heilbrigðisyfirvalda, er UNICEF að dreifa sjúkragögnum sem komið hafði verið fyrir fyrirfram. Þar á meðal til færanlegum heilbrigðiseiningum, tjöldum fyrir grunnheilbrigðisþjónustu og neyðarheilbrigðispökkum til að hægt sé að veita 226 þúsund einstaklingum grunnheilbrigðisþjónustu á ný á viðkomandi svæðum. Aðstoðin felur meðal annars í sér bólusetningar, viðbótarbirgðir fyrir heilsugæslu og geð- og sálfélagslegan stuðning fyrir börn, ungmenni og samfélög.
Á sama hátt hefur UNICEF í Líbanon aukið viðbragðsgetu sína til að ná til barna og fjölskyldna með brýna mannúðaraðstoð í ljósi vaxandi áskorana. Þar á meðal er stuðningur við þá sem eru verst settir, bæði í sameiginlegum neyðarskýlum, meðal móttökusamfélaga og á afskekktum svæðum. Í samstarfi við aðra hefur UNICEF aukið heilbrigðisþjónustu með samþættri nálgun – þar á meðal bólusetningum, nýburagjörgæslu og barnagjörgæslu – í yfir 290 neyðarskýlum og fyrir meira en 480.000 manns í móttökusamfélögum. Að auki hefur UNICEF gert við 20 vatns- og hreinlætiskerfi víðs vegar um landið og þannig tryggt áreiðanlega vatns- og fráveituþjónustu fyrir yfir 1,2 milljónir manna.
UNICEF tekur undir og ítrekar ákall Aðalritara Sameinuðu þjóðanna um tafarlaust vopnahlé og lækkun á spennustigi milli aðila. Allir stríðsaðilar verða að sýna ítrustu aðgæslu. Samkvæmt alþjóðlegum mannúðarlögum ber ávallt að vernda almenna borgara, þar á meðal – og sérstaklega – börn, sem og borgaralega innviði.